أهم 10 دروس اتعلمتها في حياتي
بقلم أ.د.عمرو حسن الحسني
بوست الجمعة النهاردة عن أهم 10 دروس اتعلمتها في حياتي
دروس الحياة مش لازم تبقي فلسفيه عميقه معقدة .. لأ خالص .. اللي بيحب يتعلم بيتعلم من أقل موقف .. ساعات كلمات بسيطة تعلق في ذهننا و تغير فينا .. و ساعات خطب عملاقه لا نخرج منها بشيء
١- خذ لا لك .. هات لا منك : اتقالت في الصدقة .. اتعلمت اني لما اعمل حاجه كويسه مع حد .. بأعملها لله .. مش عشان يشكرني أو يمجدني و لذا لا يزعجني كثيرا حجود بني البشر .. اخلص عملك لله و لا نريد منكم جزاء و لا شكورا 🙏
٢- اعرف صاحبك و علّم عليه👿: مثل شعبي عبقري .. بأطبقه حرفيا .. لا تكثر الشكوي من الناس و طبائعهم و خصالهم .. اعرف طبع كل واحد و تعامل معه علي أساس طبعه إن كنت مضطرا للتعامل معه .. و أهجره ان كنت غير مضطر ..سهله و الله .. فكرة انك تبقي فاكر أن اللي فيه عيب ممكن يغيره ده عيب فيك😏 انت شخصيا محتاج تغيره و مش ممكن تغيره لأن اللي فيه عيب مش ممكن يغيره ف هتفضل طول الوقت فاكر أن اللي فيه عيب ممكن يغيره.. سنين طويلة باجاهد في هذا العيب فيا لحد ما ظبطته الحمد الله.💪
٣-"صلوا صلاة مودع":جمله من كتر ما الواحد بيسمعها من اﻻئمه عند إقامة الصلاة مبقاش بيركز في معناها.. بس دايما بأتذكر ان اليوم قد يكون الاخير و كل ما بأنسي بأفكر نفسي ..و أقولها.. صم صيام مودع..تصدق صدقه مودع..و أطلب العفو ممن أسأت اليهم ..ﻷنك مودع..و أعمل شغلك وكأنك مودع..و شغل في عربيتك قناه الراديو اللي تنفع مع واحد مودع..و أكتب ستاتس و كأنك مودع
٤- النظر إلي الرجيع💩: أحد السلف حد بيسأله .. أينظر أحدنا إلي رجيعه؟ (يعني برازه) ..قال نعم ..ليعلم ما بخلت به نفسه كيف صار ..رد عبقري بصراحة .. بأطبقه في كل حاجه تحدثني نفسي فيها أن أبخل ..و دي بتاعتي و تعبت فيها و من حقي .. علم او عمل او فلوس.. كله هيبقي جيفه .. فأنفق بلالا و لا تخش من ذي العرش إقلالا.
٥- التوازي : أو الparallelism .. اتعلمت أن أي وقت في حياتي بأعمل فيه حاجه واحدة هو وقت مهدر .. الواجبات أكثر بكتير من الاوقات .. سواء واجبات الدنيا أو الاخرة .. و لذا لازم أبقيmultitask 👨💻👨🔧👨🏫
يعني تنجز التليفونات اللي وراك و انت بتشتغل في ترتيب الديسك توب مثلا .. تقول الأذكار و انت بتلبس .. تسمع محاضرة و انت بتأكل ..
٦- درس بسيط علمتهولي أمي بارك الله فيها أن لازم يبقي عندي backup او نسخة تانيه من أي حاجه مهمه في حياتي .. المفاتيح.. المستندات ..ملفات الكمبيوتر .. فكرة ال backup أو plan B
أو الخطط البديلة في الحياة عموما مهمه جدا ..متعرفش بكرة مخبي ايه
٧- متبصش في ورقة زميلك : اتعلمت اخليني في ورقتي .. اختار اختياراتي و ارضي عنها ..لو اخترت انك تبقي اكاديمي علمي ناجح .. متبصش للي بقي راجل أعمال و عنده فلوس اكتر.. اخترت انك تموت نفسك في الشغل متبصش للي بيقضيها سفر و ساحل .. اخترت أنك تأكل كل االي نفسك فيه و تدلع كرشك 🍝🍜🥮🍗متبصش لنفسك في المرايا 😁... و قس علي ذلك كل حاجة
٨- متزيطش: لا تبالغ في أي شيء ..متفرحش أوي .. و متزعلش أوي .."لكيلا لا تأسواعلي ما فاتكم و لا تفرحوا بما آتاكم و الله لا يحب كل مختال فخور ".. الحاجه الوحيده اللي تستاهل الفرحة هي رضا ربنا و دي حاجة مش توصل لمرحلة إنك تبقي متأكد منها
"قل بفضل الله و برحمته فبذلك فليفرحوا".. الدنيا كلها مراجيح مولد النبي .. حتي لو بقيت رئيس مجلس إدارة الكرة الأرضية 😀 فانت رئيس مجلس إدارة مراجيح مولد النبي فما تعش الدور .. إنك لن تخرق الأرض و لن تبلغ الجبال طولا
٩- نصف رأيك في رأس أخيك : اتعلمت اتعلم من الناس و خبراتهم ..كنت بأعيب علي نفسي دوما أني مش بيعجبني إلا اللي في دماغي و ده حال ناس كتير .. طورت في نفسي كتير عشان اسمع اكتر ما اتكلم ..خبراتنا عاملة زي المناعة المكتسبه .. كل واحد مناعته غير التاني .. عشان كده هأسيب رقم ١٠ فاضيه .. لأسمع الدروس اللي علمتها لكم الحياة
١٠- ....................................................
............................................
#د_عمرو_حسن_الحسني
